Moramo priznati da smo se oduševili kada smo prvi put probali zdrave kolače. Prije svega lakoća i brzina spremanja, samo jedna zaprljana zdjela a tek osjećaj da radite nešto dobro za svoj organizam. Tada smo spremali bombice, koje su i dalje nama omiljeni slatkiš.
Ova torta je odlična ako želite da pojedete nešto slatko a zdravo. Stepen slatkoće možete prilagoditi svom ukusu povećavajući količinu javorovog sirupa. Za razliku od većine zdravih kolača i torti ova ipak ima koru koja se peče.
Ako pak ne želite da pečete koru kokosovo ulje i javorovov sirup zamijenite sa 170gr svježih urmi (bez košpice). Pripremajte je po istom principu kao i koru koja se peče, samo je umjesto u rernu stavite u frižider na par sati, da se stegne.
Avokado važi za jednu od najzdravijih namirnica, bogat je zdravim mastima i vitaminima (sadrži skoro 20 vitamina ). Iako banane važe za voće koje ima u sebi najviše kalijuma činjenica je da je avokado bogatiji kalijumom čak i od banana. Zbog svog blagog i kremastog ukusa može se koristiti kao osnova za brojna slatka i za slana jela. Kombinacije su nebrojene a o tome svjedoči i Avocado Café, na čijem meniju se nalaze jela čiji je osnovni sastojak avokado.
Ruku na srce, znamo sve o dobrim stranama avokada, pa čak i to da važi za voće koje skoro i da se ne tretira hemikalijama, a jedina loša strana mu je visoka cijena 😉
